mostapha nagy

الحياة عموما مُتعبة، في حلوها ومُرها، سعادتها وتعاستها. ودا شيء غريب مُلاحظ ومعروف للناس كلها سواءً فكروا فيه أو اتكلموا عنه او لا. كل شيء في الحياة الطاقة المُحرّكة له هو التعب.
عايز نتائج كويسة، إتعب في العملية. عايز تفهم حاجة ، اتعب في التعلم. عايز علاقة معينة تستمر أو تنقطع ، اتعب على استمرارها أو انقطاعها. عايز تعمل حاجة، اتعب في البحث. قدامك خيارات، اتعب في التفكير. عايز تنتقل من وضع A الى وضع B في شغلك أو حياتك الإجتماعية أو الانسانية أو النفسية ، المطلوب منك هو انك تتعب لتنفيذه.
حصلت مصيبة ، اتعب على الصبر. حصلت مفاجأة سارة، اتعب للاستمتاع والاحتفال بها. فيه مناسبة معينة ، اتعب للتحضير لها. فيه شخص ما هتقابله، اتعب في تحضير كلام مناسب، وهكذا.
دائرة لا تنتهي من التعب. كأن الإنسان اتخلق عشان يكابد الأشياء، سواءً لتلبية رغباته ومعناه الخاص في السعادة بإرادته طوعاً ، أو لمواجهة الأشياء اللي بتترمى في طريقه من غير إرادته كرهاً.
المعري لما قال: تعبٌ كلها الحياة ، فما أعجبُ إلا من راغبٍ في ازديادِ. مكنش متشائم أو بومة ، هو كان بيوصف الواقع كما هو بالضبط.